काठमाडौं, कात्तिक १४– काठमाडौंबाट शुक्रबारदेखि प्रदर्शनमा आएको चलचित्र ‘टलकजंग भर्सेस टुल्के’ले राम्रो सुरुवात गरेको छ । काठमाडौंका झण्डै एक दर्जन बढी हलहरुबाट प्रदर्शन आरम्भ गरेको टुल्के राजधानी बाहिर भने कात्तिक २१ गतेदेखि मात्रै प्रदर्शनमा आउनेछ ।

क्युएफएक्स अन्तरर्गत सिभिल मल, कुमारी, जय नेपाल हलमा चलचित्रका लागि ७ शो छुट्याईएको छ । त्यस्तै बिग मुभिज, सिने दि सेफ, गोपीकृष्णा, अष्टनारायण, गुण सिनेमालगायतका हलहरुमा पनि चलचित्रको प्रदर्शन भईरहेको छ ।

राजधानीको मुख्य मल्टिप्लेक्स क्युएफएक्स अन्तर्गतको सिभिल मल, जय नेपाल र कुमारी हलमा ‘टलकजंग भर्सेस टुल्के’ को अग्रिम टिकट बुकिङ खुल्ला गरिएका थियो । कतिपय शोहरु शनिबारसम्मको लागि अग्रिम बुकिङ्ग ‘फुल’ भएको निर्माण युनिटले जानकारी गराएको छ ।

‘बिहानीको शोबाट सन्तुष्ट छौ, दोस्रो शो मा पनि अकुपेन्सी राम्रै छ, प्रायः हलमा दर्शक हाउसफुल नजिक छन्’, चलचित्रका कार्यकारी निर्माता रबिन्द्र सिंह बानियाँले भने ‘चलचित्रमा हामीले देखाउन खोजेको कुरालाई दर्शकले निकै राम्रो मानेका छन, हामीलाई यसले झन खुशी दिएको छ’ ।

चलचित्रका निर्देशक निश्चल टुल्के हेर्न लुटको ह्याङ्गओभर लिएर नआउन अनुरोध गर्छन । ‘टुल्के, लुट जस्तो छैन, यसमा भिन्नै परिवेशको कथा देखाउने कोशिस गरेको छु’, बस्नेतले भने ‘टुल्केमा आफ्नै किसिमको मज्जा छ,  टुल्केमा देखाईएको नेपालीपन अनि हाम्रो आफ्नै कथालाई दर्शकले रुचाएको पाईयो ।’ सुपरहिट चलचित्र ‘लुट’ का निर्देशक निश्चल बस्नेतको निर्देशनमा बनेको फिल्म ‘टलकजंग भर्सेस टुल्के’ मा खगेन्द्र लामिछाने, ऋचा शर्मा, दयाहाङ्ग राई, सुशांक मैनाली, रजनी गुरुङ्ग, प्रकास घिमिरे, राज थापा लगायतका कलाकारहरुले अभिनय गरेका छन् ।

लप्पन छप्पन नजान्ने एक सोझो गाँउले ठिटोले आफ्नो गुमेको परिचय खोज्न गरेको संघर्षको कथालाई चलचित्रमा उठान गरिएको छ । द्वन्द्वको परिवेश भित्रको समाज कसरी अगाडि बढिरहेको हुन्छ त ? के कस्ता षडयन्त्रका तानाबाना बुनिन्छन् त ? भन्ने बिषय पनि चलचित्रले उठान गरेको छ । षटकोण आर्टस् र ब्ल्याकहर्स पिक्चर्सको संयुक्त ब्यानरमा बनेको यो चलचित्रमा रामकुमार बनिया, रोजिना सिटौला र सीता श्रेष्ठको पनि लगानी रहेको छ ।