ओखलढुंगा, कात्तिक १४– स्थानीयबासीको सक्रियतामा ओखलढुंगा सामुदायिक अस्पताल परिसरमा जाँड, रक्सी बिक्री वितरणमा रोक लगाएको छ । जाँड, रक्सी उत्पादन तथा बिक्रीवितरणले समाज र अस्पतालमा आउने विरामी तथा कुरुवालाई समेत नकारात्मक असर गर्ने भएकाले अस्पताल परिसरका यस्ता पदार्थ रोक लगाएको हो ।

अस्पतालद्धारा सञ्चालित लालूपाते क्लबको अगुवाईमा नागरिक समाज, व्यापारी, होटल व्यवसायी लगायतको सहमतिमा अस्पताल परिसारलाई जाँड, रक्सी निषेधित क्षेत्र घोषणा गरेको क्लबका अध्यक्ष तिलक राईले जानकारी दिनुभयो ।

यो घोषणासँगै अस्पताल वरिपरि करिब ५ सय मिटरसम्म जाँड, रक्सी वेचविखन र सेवन गर्न नपाईने, यदि कसैले अटेर गरे तत्काल कारवाही गरिने नियम लागू भएको छ । अहिले आसपासका सडक र होटलमा ‘यहाँ जाँड रक्सी पाइँदैन’  र ‘यो मदिरा निषेधित क्षेत्र हो’ जस्ता सन्देश लेखिएका बोर्ड राखिएका छन् ।

जाँड रक्सी कारण विभिन्न अकल्पनीय घटना घट्ने, मानव स्वास्थ्यमा गम्भिर असर पर्ने भएकोले क्लवको अभियान स्वागत योग्य भएकोे सहायक प्रमुख जिल्ला अधिकारी गुणराज भटराईले बताउनुभयो । क्लबले केहि वर्षदेखि निरन्तर जाँड रक्सीको कुलतमा परेकालार्ई पुनर्स्थापना गर्ने काम गरिरहेको छ ।

तस्वीरः शिव ढुंगाना/उज्यालो